Txiotesia

Txiotesia euskal ikertzaile gazteen lanak gizarteratzeko eta haiei izen-abizenak jartzeko UEUk 2013az geroztik bi urterik behin antolatzen duen lehiaketa da. Ikertzaile gazteen sarea sendotzea eta zientziaren dibulgazioa euskaraz sustatzea ere badira egitasmoaren helburuak.

Parte-hartzaileek Artizarra, Mastodon, Instagram, Bluesky edo Linkedin sare sozialetatik zabaldu behar dute beren ikerketa-lana (idatziz edo bideoz, bietako batetatik). Bi irabazle izendatuko dira: Idatzizko #txiotesirik onena (400 €) eta Ikus-entzunezko #txiotesirik onena (400 €).

Parte hartzeko argibideak

ARAUAK

Lehiaketa egun bakarrean egingo da eta egunean bertan goizeko 09:00etatik 21:00etara bitartean bidali behar dira parte-hartzeak.
Parte hartzeko tesia 2023-2026 urte bitartean (biak barne) aurkeztuta izan behar da edo gaur egun tesia egiten aritu.
Sare sozial hauetako batetik parte hartu daiteke: Artizarra, Mastodon, Instagram, Bluesky edo Linkedin.
Parte hartzeko kontu publikoa izan behar da.
Parte hartzen den sare sozial horretako UEUren kontua jarraitu behar da: Artizarra, Mastodon , Instagram, Bluesky edo Linkedin
Tesia edozein hizkuntzatan landua izan daiteke, baina lehiaketan euskara hutsean parte hartu behar da.
Parte hartzeko bi modalitate daude: idatziz edo bideoz. Hautatu egin behar da eta batean edo bestean parte hartu. Ez bietan.

IDATZIZ PARTE HARTUZ GERO:

Parte hartzeak guztira 1.500 karakete izango ditu gehienez, traolak barne. Karaktere kopuru hori ez gainditzea parte hartzailearen ardura izango da. Kopurua gainditzen duten parte hartzeak ez dira kontuan hartuko.
Mezu bakoitzaren amaieran derrigorrez jarri behar da #txiotesia8 traola.
Mezuan hasieran tesiaren izenburua idatzi behar da, hau ere euskaraz.
Mezuaren amaieran tesiaren emaitza edo ondorioa jaso beharko da, edo hasi berri diren ikerketen kasuan, planteatzen den hipotesia.
Tesiaren zati bati edo proiektu osoari buruz aritzeko aukera dago.
Ez dira onartuko mezuak ordezkatuko dituzten testu osagarri, dokumentu atxiki edo ikus-entzunezko baliabidetara bideratutako estekak.
Mezuen aurkezpena aberasten duten elementuak erabili ahal izango dira, betiere irakurlearen arreta erakartzeko, informazioa ilustratzeko edota mezuak erakargarriago egiteko helburuarekin (estekak, emotikonoak, irudiak, gif animatuak, etab.).

BIDEOZ PARTE HARTUZ GERO:

Minutu eta erdiko bideoa izango da gehienez, 90 segundukoa.
Bideo bakarrean egingo da parte-hartzea.
Bideoaren hasieran tesiaren izenburua aipatu behar da, hau ere euskaraz.
Bideoaren amaieran tesiaren emaitza edo ondorioa jaso beharko da, edo hasi berri diren ikerketen kasuan, planteatzen den hipotesia.
Tesiaren zati bati edo proiektu osoari buruz aritzeko aukera dago.

Parte hartzeko derrigorra da galdetegi hau betetzea. Bertan hainbat datu eskatuko dira: Izen-abizenak, zer/non/noiz ikertzen ari zaren eta e-posta helbidea.
Edozein zalantza edo informaziorako: komunikazioa@ueu.eus