Bazkideak
UEUren oinarria soziala da: bazkidez osatzen da. Une honetan 1.400 bazkide baino gehiago ditu Euskal Herri osoan, UEUko 27 sailetan biltzen direnak. Bazkideak gutxienez urtean behin Batzar Nagusian biltzen dira aurreko urtean egindako lana eta hurrengo urteko egitasmoa onartzeko.
UEUkide egiteko hainbat arrazoi
Orri honetara iritsi bazara, beharbada UEUko bazkide egitea pentsatzen zabiltzalako da; eta hori albiste ona da guretzat, UEU oinarri soziala duen elkartea baita.
Une honetan 1.400 bazkide ditugu Euskal Herri osoan zehar, eta haiek ematen digute aurrera egiteko kemena eta babesa.
Abantailak
- % 25eko beherapena izango duzu ikastaro eta jardunaldien matrikuletan eta hauetan parte hartzeko lehentasuna izango duzu. % 30eko beherapena izango duzu liburu, aldizkari eta argitalpen guztietan (sartu gure dendan).
- Hego Euskal Herrian bizi bazara PFEZan % 20ko desgrabazioa izango duzu.
- UEUren lan-poltsetan sartzeko aukera izango duzu eta bazkide izanda abantaila batzuk izango dituzu.
Unibertsitatea egiteko beste modu bat
UEUren misioa den Euskal Unibertsitatearen eraikuntzan lagunduko duzu. Euskal Herri osoa hartzen duena, euskara hizkuntza nagusia izango duena eta euskal gizartearen beharrei erantzungo diena. Azken urte hauetan euskarazko online unibertsitatea sortzen saiatzen gabiltza, Euskal Herriaren garapenarentzat ezinbesteko egitasmoa iruditzen zaigulako.
Euskarak behar duelako
Nahiz eta aurrerapen handiak egin diren, oraindik ez da posible Euskal Herri guztian euskaraz ikastea. Horretaz gain, profesionalen mundua ere oso erdalduna da eta ikerketan atzerriko hizkuntzek balio handiagoa dute euskarak baino.
Sare baten parte
Bazkideak sailetan banatzen ditugu (Antropologiatik hasi eta Zuzenbideraino). Zuri interesatzen zaizkizun jakintza-alorrei buruzko zuzeneko informazioa jasoko duzu eta aditu-sare bat izango duzu eskura. Topagune ere bagara eta horren adibide dira urtero antolatzen ditugun jardunaldi eta topaketak, UEUko sailekin zein bestelako elkarte eta erakundeekin elkarlanean antolatzen ditugunak. Horretaz gain, ikertzaile gazteen ikusgarritasuna areagotzeko zein haien arteko elkarlana sustatzeko hainbat proiektu ere baditugu martxan.
Esperimentazio- eta ikasketa-gune
UEU oso parte-hartzailea da. Zuzenean antola dezakezu ikastaro edo jardunaldi bat, liburu baten proposamena egin dezakezu, edota bururatzen zaizun (ia) edozein proiektu egia bihurtzen dugu. UEU esperimentazio- eta ikasketa-gune zoragarria da.
Zenbat ordaindu behar dut bazkidetza?
Hau guztia URTEAN 50 euroko kuotaren truke. Gainera, ikasle, langabetu edo jubilatua bazara, 30 eurokoa izango da kuota hori.