Irratibidearen barrunbean zehar

Liburu hau irratibidean sakontzearren idatzi du egileak, hobeto ezagut dezagun eta, bidenabar, irrati-albistegintzaren teknika eta teoriaz jabe gaitezen. Antzinako harigabeko telegrafiatik ziber-irratietara irratibidearen historia laburra topa daiteke lehenengo orrialdeetan eta azkenekoetan. Erdialdean irratiaren mintzaira aztertutakoan, irrati-albistegintzan oso garrantzizkoak diren gaiak jorratzen dira: informazio-iturriak, generoak, programazioa eta abar.
Beraz, irrati-hedapenak ehun urte bete dituela-eta, XXI. mendean hedabide herrikoi honek aldakuntza handiak izango dituzkeenez gero, abagunea aurkitu du Palazio irakasleak, hein handiz Giuglielmo Marconi-k asmatu zuen hedabideari buruz idazteko, beti ere Euskal Herriko irratigintzaren egoera, bilakaera eta irratilarien lan-ohiturei erreparatuz.