"Akademiatik plazara" ekitaldia, ikertzaile gazteen mikro-hitzaldiak Bilbon
2024ko irailaren 30a
Urriaren 24an (osteguna), "Akademiatik plazara: ikertzaile gazte euskaldunak oholtzara" ekitaldia egingo du UEUk Bilboko BIRA kulturgunean, Bizkaiko Foru Aldundiaren babesarekin. Bertan, ikertzaile gazte euskaldunek beraien ikerketa lanen berri modu labur eta dibulgatzailean emango dute. Ekimen honen helburua ikertzaile gazteen ikusgarritasuna handitu eta egiten duten lana aitortzea da. Hauek izango dira parte hartuko duten ikertzaile gazteak:
- Ane Portillo Blanco "Zientzien irakaskuntzaren eta STEM hezkuntzaren arteko tartea murriztuz"
- Claudia Torralba Rubinos "Eusko legebiltzarreko interpreteen lana aztergai. Bide berrietan barrena"
- Irati Mendia Garcia "Bidaiari-trenen esekidura pneumatikoaren karakterizazio eta modelizazio dinamikoa"
- Ivan Gomez Lopez "Opuntia spp. kaktusa, obesitatea maneiatzeko konposatu bioaktiboen iturria"
- Xabier Arraztoa Lazkanotegi "Litio-ioizko bateria elektrikoak kudeatzeko sistemen moldakortasuna eta segurtasun funtzionala"
Protagonista hauekin batera Ana Zubiaga Elordieta eskarmentu handiko ikertzailea ere egongo da, bere ibilbide oparoaren nondik norakoak azaltzen. Eta guztiak gidatzen Maite Luengo Aguirre Arte Garaikidean doktorea arituko da. Amaitzeko, ekitaldiaren laburpena egiten saiatuko dira Onintza Enbeita Maguregi eta Unai Iturriaga Zugaza-Artaza bertsolariak.
Etorri nahi duzu? Bidali mezu bat komunikazioa@ueu.eus helbidera.