Benetan inklusiboa al da gure hezkuntza ikasle gorrentzat? Interpreteaz haratago, hizkuntza, identitatea eta komunitatea erdigunean.

Inklusioaren diskurtsoak gero eta presentzia handiagoa du hezkuntzan, baina oraindik erronka asko daude gainditzeko. Praktikan gauzatzen ari garen inklusio-ereduak erantzuten al die ikasle gorren behar eta eskubideei? Eredu horri buruz hausnartuko dugu jardunaldi honetan. Gaur egun eskaintzen zaizkien baliabideak —hala nola zeinu-hizkuntzako interpreteak eta PT irakasleak— beharrezkoak eta baliagarriak dira, baina ez dira nahikoak haien hezkuntza-eskubideak guztiz bermatzeko. Horrek, gainera, ikasle gorren hezkuntza eta gizarteratze-bidean oztopoak sortzen ditu. Horrela, inklusio erreal baterako kontuan hartu beharreko gakoei buruz arituko gara. Halaber, profesional gorraren rola eta beste toki batzuetan garatutako ekimen berritzaileak aztertuko ditugu. Helburua: ikasle gorren eskubideei eta beharrei erantzuteko hezkuntza-sistema hobea eraikitzea. Etorri eta parte hartu hausnarketa kolektibo honetan!

Jardunaldi hau elkarlanean antolatu dute UEUk eta ESHIE.ZHIE elkarteak.

• Ikasle gorren hezkuntza-beharrei erantzuten dieten eredu berritzaileak ezagutzea.
• Ikasle gorren beharrei buruzko hausnarketa egitea.
• Egun EAE eta Nafarroan dagoen hezkuntza-ereduari buruz hausnartzea, ikasle gorrei eskaintzen zaien hezkuntza-ereduan sakonduz.

Jardunaldi hau hezkuntzan lan egiten duten guztiei zuzenduta dago, batez ere ikasle gorrekin lan egiten duten profesional eta adituei. Horretarako, irakasleak, bitartekariak, aholkulariak eta zeinu-hizkuntzako interpreteak parte hartzera animatzen ditugu. Halaber, ikasle gorren erreferente diren zentroetako zuzendaritzako kideentzat eta erabakiguneetan parte hartzen dutenentzat ere interesgarria izango da. Azkenik, gorren familiei eta gor-komunitateari ere zabaldu nahi zaie, hezkuntzaren inguruko ikuspegi gehiago eskuratzeko eta euren eskubideak eta beharrak hobeto ulertzeko.