LGTBI+ gorroto- delituak nerabezaroan: pertzepzioak, ondorioak eta neurriak

Ikastaroaren datak: Ekainak 25 eta 26 (Asteazkena eta osteguna)

Kurtso honen xede nagusi da etorkizuneko irakasleei, jardunean diharduten irakasleei zein hezkuntzako bestelako eragileei nerabezaroan ematen diren LGTBI+ diskriminazio egoeren gaineko informazio eguneratu eta zientzian oinarritutakoa eskaintzea. Kurtsoan zehar, parte hartzaileek diskriminazio ezberdinen iturriak, jatorria eta eraginak aztertzeaz gain, egoera hauei aurre egiteko tresna aproposak emango zaizkie. Egun, nerabezaroan ematen diren LGTBI+ diskriminazio egoerek kezka sorrarazten dute hezitzaile zein hezkuntza eragileengan eta gai honetan sakontzeko interes berezia dago. Izan ere, azken hamarkadan igoera nabaria egon da diskriminazio mota hauetan, eta gure eskolen egunerokotasunean honakoa argiki islatzen da. Ezarritako arau sozialetatik era batean ala bestean aldentzen diren nerabeek LGTBI+ diskriminazioa pairatzeko arriskua dute eta hau jasateak osasun mental zein fisikoan ondorio larriak izan ditzake (Adelson et al., 2016; Pickles, 2021; Prairie et al., 2022; Ybarra et al., 2015).

• Etorkizuneko irakasleei, jardunean diharduten irakasleei zein hezkuntzako bestelako eragile garrantzitsuei nerabezaroan gauzatu daitezkeen LGTBI+ gorroto-delituen gaineko informazio teoriko zein praktikoa eskaintzea.

• Etorkizuneko irakasleei, jardunean diharduten irakasleei zein hezkuntzako bestelako eragileei LGTBI+ gorroto-delituek nerabeengan izan ditzaketen eragin kaltegarriak azaltzea eta hauen inguruko sentsibilizazioa bultzatzea.

• LGTBI+ gorroto-delituen testuinguraketa teoriko eta formala burutzea egungo marko eguneratutik.

• Etorkizuneko irakasle, jardunean diharduten irakasle zein hezkuntzako bestelako eragileak nerabezaroan eman daitezkeen LGTBI+ gorroto-delituen aurrean erantzun egokiak izateko trebatu.

• LGTBI+ gorroto-delituak eta diskriminazio gertaerak nerabezaroan: definizioa, egungo legedia eta indarkeria mota nagusiak (bullying-a, senitartekoan emandako indarkeria…).

• Gorroto-delitu eta diskriminazioaren marko teoriko eguneratuaren lanketa: Meyer-en (1995) “Minority Stress Model” teoria.

• Diskriminazio gertaerak jasatearen ondorioak nerabeengan: osasun mentaleko arriskuak (autoestima gutxitua; suizidio-arriskua; depresio- eta antsietate-sintomatologia; drogen kontsumoa, eta bestelako osasun mentalaren arazoen prebalentzia).

• Irakaskuntza jardunean diskriminazioa hautemateko eta honakoari irtenbide aproposa emateko gakoen lanketa.

• Gai hauen egungo egoera Euskal Autonomia Erkidegoan eta Nafarroan: ikerketa eguneratua, kasu praktikoak, ekintza eta plan zehatzak.

Irakasleek saio magistral bat eskainiko dute gaiko teoria eta nozio garrantzitsuenak aurkeztuz. Saioaren helburu izango da gaira sarrera burutzea eta irakasleek ikasleek jakin beharreko terminologia eta nozio azpimarragarrienak aurkeztea. Saio magistrala izan arren, irakasleek ikasleen arteko eztabaida sustatuko dute, dituzten aurre ezagutzak baliatuz eta feedback eta feedforward-a eskainiz. Honela, saio teoriko-praktikoa izango da honakoa, ikasgaiko erritmoa eta egitura markatuko dituena.

Etorkizuneko irakasleei, jardunean diharduten irakasleei zein hezkuntzako bestelako eragile garrantzitsuei.