Nazioa eta hezkuntza-sistema espainiarraren sorrera

Neurri handi batean, nazionalismoaren gaiari heltzerakoan, hezkuntza-arloko
azterketa gutxietsia izan delako, edo hezkuntzaren (gaia) analisi-ardatz
nagusitzat hartua izan denean nazioaren gaia gehiegizko "naturaltasunez"
begiratua izan delako -herritarrak nazioarekiko identifikazioa berezkoa balu
bezala-, ikuspegi historiko batetik hezkuntza eta nazioa uztartuko dituzten
lanak hutsune nabarmena bete beharrean izango dira. Alde horretatik, saio honek
Estatu-Nazio espainiarraren eraikuntza-prozesuaren testuinguruan ulertu behar
den hezkuntza-sistema nazionalaren sorrera aztertzea du helburu,
nazio-identitate espainiarrari dagokionez, ezinbesteko erreferentzia nagusia -ez
bakarra- den heinean. Iñaki Zabaleta-ren lan honek heziketak Estatuaren eskuetan
hartu duen izaera politikoa nabarmendu du; izan ere, Estatuak nazioarena
den/izan behar duen herritarra du helburu, horretarako, besteak beste, izaera
nazionalizatzailea duen irakaskuntza-makineria goitik behera arautuz, lanean
ipiniz eta kontrolatuz.