(49) Omega-3 gantz-azidoen eragin neurobabeslea nerabezaroan aldizkako gehiegizko alkohol-kontsumoaren ostean: eikosanoide-endokannabinoide seinaleztapen gurutzatuaren garrantzia

Garazi Ocerin¹, Imanol González-Burguera², Miquel Saumell-Esnaola², Maitane Serrano¹, Itziar Bonilla-Del Río¹, Nagore Puente¹, Inmaculada Gerrikagoitia¹, Gontzal García Del Caño², Pedro Grandes¹

¹Neurozientziak Saila. Medikuntza eta Erizaintza Fakultatea (UPV/EHU, Leioa, Bizkaia), ²Neurozientziak Saila. Farmazia Fakultatea (UPV/EHU, Gasteiz, Araba)

garazi.ocerin@ehu.eus

Laburpena

Nerabezaroa garapenaren aldi kritikoa da, eta garuna oso sentikorra da botiloi gisako neurriz kanpoko alkohol-kontsumoarekiko. Alkoholak eragindako kalte iraunkorretan, mikrogliaren erantzuna eta eikosanoide proinflamatorioen ekoizpena funtsezkoak dira, eta 2-arakidonilglizerol (2-AG) endokannabinoideak eikosanoide proinflamatorioen iturri gisa garrantzi handia izan dezake. Sagu-eredu batean, alkoholak mikrogliaren egituran eta eikosanoide sintesian parte hartzen duten monoazilglicerol lipasa (MAGL) eta zikooxigenasa-2 (COX-2) entzimen espresioan duen eragina aztertu dugu, bai eta omega-3 gantz-azidoek aldaketa horiek arintzeko duten gaitasuna ere. Gure emaitzek omega-3 gantz-azidoek alkoholaren ondorio kaltegarriak murrizteko duten potentziala nabarmentzen dute.

Gako-hitzak: Nerabezaroa, Aldizkako alkohol-kontsumoa, Mikroglia, Neuroinflamazioa, Omega-3 gantz-azidoak, Endokannabinoideak