Komikigintza eta literaturaren irakaskuntza.

Eusko Jaurlaritzaren irakasleen formaziorako plangintzaren bidez homologatutako ikastaroa (ikusi argibideak behean).

Ikastaro honek literatura-irakasleak, literatura-eragileak edo literaturazaleak komikiaren artera hurbiltzea du helburu nagusi, betiere komikigintzaren eta literaturgintzaren arteko zubi-lana gogoan izanda. Bide horretan, hiru zutabe nagusi izango ditu ikastaroak:

Lehenik, komikiaren inguruko ezagutza orokor zenbait eskainiko dizkigute alorreko adituek (komikiaren narrazio-teknikak, komikiaren bilakaera historikoa...).

Bigarrenik, komikigile eta gidoigileek bere obraren eta jardunaren inguruan hitz egingo digute, ekarpen horiek irakurtzeko eta interpretatzeko informazio gehiago izateko.

Hirugarrenik, komikia lantzeko proposamen didaktiko zenbait aurkeztuko dizkigute literatura-irakasleek.

Irakasleak

• Mikel Ayerbe Sudupe

  UPV/EHUko irakaslea, literatur kritikaria, literatur ikerlea. UEUkidea.

• Dani Fano Ardanaz

  Komikigilea, irudigilea.

• Maite Gurrutxaga Otamendi

  Ilustratzailea, Arte Ederretan lizentziatua, Bartzelonako Escola de la Donan ilustrazioa ikasia.

  Bloga: maitegurrutxaga.blogspot.com.es

• Jon Mantzisidor Uria

  Komikigilea, UPV/EHUko Arte Ederren Fakultateko irakaslea.

• Jon Martin Colorado

  Komikigilea, UPV/EHUko Arte Ederren Fakultateko irakaslea.

• Bego Montorio Uribarren

  Itzultzailea, UPV/EHUko irakaslea.

• Josune Muñoz San Jose

  Skolastikako kidea, literatura-irakaslea.

• Iratxe Retolaza Gutierrez

  UEUko Literatura saileko sailburua. Euskal Filologian lizentziatua. UPV/EHUko irakaslea. Aldizkari eta egunkarietako kolaboratzailea.

• Amaia Serrano Mariezkurrena

  UEUko literatura saileko sailburua. Magisteritzan diplomatua eta Euskal Filologian lizentziatua da. 1936ko Gerra eta euskal nobelari buruzko tesia idatzi du. Argia aldizkariko liburu kritika egin izan du eta EHUko Donostiako Hezkuntza, Antropologia eta Filosofia fakultateko irakaslea eta ikertzailea da.

• Asisko Urmeneta Otsoa Errarteko

  Komikigilea.

Helburuak

Komikigintzaren eta literaturaren arteko zubi-lan horretan sakontzeko, honako hiru gaitasun hauetan trebatzea du helburu ikastaroak:

• Komikigintzaren narrazio-teknikak, estetikak eta kodeak ezagutzea.
• Literatura testuen eta komiki-lanen arteko zubiak egiten trebatzea.
• Komikiaren irakurketan eta irakurketa literarioan gaitzea, bi arte adierazpideen arteko aldeak zein antzekotasunak gogoan izanda.

Metodologia

Hiru saio mota egongo dira ikastaro honetan: batetik, komikiaren teoriaz jabetuko gara, betiere adibide jakin batzuk oinarritzat hartuz; bestetik, artista jakin batzuekin solasean aritzeko aukera izango dugu, haien esperientziaren berri izan, eta haien jardunaren inguruko elkarrizketa sustatuz; eta azkenik, saio praktikoagoak izango ditugu, komikien irakurketa eta irakurketa literarioa jorratzeko.

Bestalde, parte-hartzaileei material osagarria banatuko zaie ikastaroan zehar, literaturaren irakaskuntzan komikia lantzeko baliabide zenbait eskuragarri izateko.

Nori zuzendua

Literaturazale oro, literatura-irakasleak, komikizaleak.

Egitaraua