Identitate di-soluzioak: narrazio performatiboak generoa eta euskal identitatea uztartuz.

Ikastaro honi 14 ordutako Balio Akademikoa aitortuko zaio.

Izaera teoriko eta praktikoa uztartzen dituen kurtso honen bidez, identitate kolektibo desberdinek beraien taldetasuna (“gu”) performatzeko dituzten bide, mekanismo, logika, praktika eta plano desberdinak jorratu eta hausnartu nahi ditugu.

Norbanakoak bere baitan hainbat talde identitate artikulatzen dituela kontuan hartuz, hauen arteko mugen permeabilitate eta emankortasunak jarri nahi ditugu ikusmiran. Alde batetik, norbanakoaren baitan identitate mota desberdinak nola uztartzen diren ikertuko dugu. Bestetik, nortasun hori plano desberdinen arabera nola birsortzen den ikusten saiatuko gara: identitate kolektibo bat perspektiba pertsonal, politiko eta akademiko batetatik nola eraikitzen den ikusiaz.

Horretarako, batetik, sexu-genero identitatean eta bestetik euskal identitatean zentratuko gara: identitatea nola (erre)produzitzen den, honen inguruko diskurtso eta praktikak zeintzuk diren, eragin instituzionalek nola baldintzatzen duten edota “gu”-tasuna nola irudikatu eta bizitzen den ikustea helburu ditugularik.

Irakasleak

• Uxoa Anduaga Berrotaran

  Soziologian lizentziatua, EHUko ikertzaile predoktorala. UEUkidea.

• Eduardo Apodaka Ostaikoetxea

  Filosofian lizentziatua, Soziologian doktorea eta UPV/EHUko irakaslea eta ikertzailea. UEUkidea.

• Jokin Azpiazu Carballo
• Idurre Eskisabel Larrañaga

  Kazetaritzan lizentziatua, UPV/EHUko irakaslea.

• Matxalen Legarreta Iza

  Soziologian lizentziatua, EHUko irakaslea eta UEUkidea.

• Marta Luxán Serrano

  Joxemi Zumalabe Fundazioko kidea. EHUko irakaslea.

  unibertsitatea.net atarian duzue irakasleei egindako elkarrizketa.

• Kattalin Miner Perez

  Kazetaria eta militante feminista.

• Laura Siles Ceballos

  Arte Ederretan lizentziatua, EHUko doktoregaia.

Helburuak

• Identitateen inguruko ikergalderak eta edukiak hausnartu.
• Identitatearen eraketa prozesu eta mekanismoak, zein diskurtso eta praktikak identifikatu eta hausnartu.
• Sexu-genero eta euskal Identitateen (erre)produkzioaren baitan ematen diren ezaugarritasunak aztertu.
• Kolektibo desberdinek zedarritzen dituzten erreferenteak identifikatu.
• Kolektibo desberdinekiko dagoen eragin instituzionala ezagutu.

Edukiak

• Identitate kolektiboen eraketa.
• Euskal identitatea.
• Sexu-genero identitatea.

Metodologia

Gaietan adituak eta arituak diren hizlariek gidatuko dute bi eguneko iraupena izango duen kurtsoa. Berauek, landu nahi diren ikuspuntuak kasu zehatzetara zein ikerketa ildo konkretuetara hurbilduaz, identitatearen problematika aurkeztu eta honen inguruko eztabaida dinamizatuko dute. Parte hartzaile guztien testigantza eta esperientziak jasotzea da kurtso honen nahia, hau dela eta, hizlariek eztabaida dinamizatu eta bideratzeko motibazio osoa izango dute.

Nori zuzendua

Orokorrean, identitatearengan interesa duen edozein pertsonarengana zuzentzen gara. Bereziki, gaia Gizarte Zientzietatik lantzen duen ikertzaileei eta zehazki, euskal gazte ikasle zein lizentziatuei.

Egitaraua