Udako Ikastaroak :: Soziologia

Iraunkortasunerako euskal transizioaz: herri-ekimenaren desafioak.

  • Izaera: Presentziala
  • Ordu kopurua: 18.00 ordu
  • Matrikula-epearen hasiera: 2010(e)ko maiatzaren 10a
  • Matrikula-epearen bukaera: 2010(e)ko uztailaren 8a

Iraunkortasuna izango da XXI. mendean gizadiak izango duen arazorik larrienetakoa, hala ikuspegi globaletik nola lokaletik. Krisi sozioekologikoa hiru gertakariren txirikordatzetik dator nagusiki: aldaketa klimatikoaren areagotzea (giza jarduerak eragindakoa); XX. mendea goitik behera baldintzatu duen matrize energetikoaren agortzea (gizartean aldaketa dramatikoak eragiteko ahala duen faktorea); eta giza ongizatearen berme diren bestelako baliabideen agortze hazkorra (ura, basoak, bioaniztasuna, etab.).

Gauzak horrela, beharbada ez dago desafio potoloagorik: gizarte iraunkorrerako trantsizioa pentsatu, diseinatu eta martxan jarri. Bide horretarako, ondokoa dugu abiapuntu: hein handi batean, krisi sozioekologikoa Modernitatearen oinarri kulturalen krisia da. Hau da, Mendebaldeko gizarteen euskarri izan den bizkarrezur kulturala dago guztiaren abiapuntuan (mundu-ikuskera, arauak, balioak, instituzioak, bizimoduak eta jokaerak). Desafio zientifiko eta teknologikoetatik harago, ezinbesteko iparra da gizartearen eraldatze sozial, ekonomiko, energetiko, politiko, kultural eta psikosoziala.

Zibilizazio-ereduaren gaineko eztabaida dugu atze-oihalean, garapen-ereduaren galdera ezin zorrotzagoa, gizarte-eredu berriak irudikatzeko eta abiatzeko gaitasuna, eta balio-sistema alternatibo baten eraikuntza. Euskal Herrian ere, arrazionaltasun sozioekologikoa indartzea da etorkizuneko gakoetako bat, paradigma berri bat eraiki aldera gure herriarentzat.

Eragile guztien lana da iraunkortasunaren aldeko trantsizioa (eremu publikoa, pribatua eta komunitarioa). Guk komunitatean jarri nahi genuke azpimarra: herrigintzaren ikuspegitik nola hel dakiokeen behar dugun trantsizioari.

 

lanki Mintegi hau Mondragon Unibertsitatearen Lanki ikertegiarekin elkarlanean antolatu da.

Irakasleak

Helburuak

  • Pertsonak biltzea, iraunkortasunaren inguruko euskal intelligentsia batzea.
  • Jakintza konpartitu eta sakontzea, begi batekin ikuspegi globalari helduz eta bestearekin euskal perspektiba zehatzagoan murgilduz.
  • Ekintza inspiratu eta sustatzea. Iraunkortasunaren aldeko praxi kolektiboak eta eredu praktikoak aztertzea (hari komunitarioen bidez trantsizio sozioekologikoari heldu diotenak). Adibide zehatz modura, ‘Transition Towns’ eredua aztertzea.
  • Estrategia pentsatzea. Euskal trantsizioaren alde, etorkizunean euskal herri edo eskualdeetan garatu beharreko estrategia herrikoi bati buruzko hausnarketa sustatzea (eragile komunitarioak protagonista diren estrategiak).

Helburu horiek begiratu diziplinartekoa eraikiz bete nahi ditugu, eta elkarrizketan jarriz herrigintzan ari diren eragileak eta mundu akademikoan ari direnak.

Edukiak

1. Euskal gizartearen diagnostikorako hainbat begiratu:

  • Begiratu panoramikoa: ‘Euskal iraunkortasuna, XXI. mendeko desafioa’
  • Begiratu energetikoa: ‘Etorkizun energetikoa Euskal Herrian’
  • Begiratu ekonomikoa: ‘Etorkizuneko euskal ekonomia (ekologikoa)’
  • Elikaduraren begiratua: ‘Zelan lortu Elikadura Subiranotasuna, gure herri eta hirietatik abiatuta’
  • Aldaketa klimatikoaren begiratua: ‘Klima-aldaketaren eraginak Euskal Herrian’

2. Iraunkortasunaren aldeko herri-ekimen berritzaileei so:

  • Herrigintza molde emergenteak munduan: ‘Transition paradigmaren oinarri teoriko eta praktikoak’
  • Herrigintza molde emergenteak euskal gizartean: ‘Herrigintzak mugarri berri bat Debagoiena bailaran: BAGARA prozesua’

3. Euskal trantsizioa ipar: herri-ekimenaren desafioak

Metodologia

Gai guztiek izango dute aditu (edo/eta aritu) baten aurkezpena (hitzaldia) eta, ondoren, gogoeta kolektiboari ekingo zaio.

Nori zuzendua

Bilgune espezializatua da buruan duguna, dibulgatzailea baino gehiago. Eta, egiari zor, ‘ikastaro’ kontzeptuak ez dio erantzuten buruan darabilgunari, adituen edo/eta arituen ‘bilgune’ bat eratzea izango bailitzateke gure asmoa. Ikuspegi batetik ala bestetik, herrigintzatik edo akademiatik, iraunkortasunaren gaian aditu direnen ‘euskal bilgune’ bat eratzea dugu helburu:

  • Hizlarien artean, Euskal Herrian erreferente garrantzitsu direnak aurreikusten ditugu, aktibistak nola akademikoak;
  • eta hartzaileen artean ere, gaian jada trebatuta dagoen jendea, edo iraunkortasunaren alde lanean jarduteko gogoz dabilena, irudikatzen dugu. Hala ere, ez da oinarrizko formaziorik eskatuko. Gaiaren inguruan parte hartze aktiboa edukitzea eskatuko da.

Edozelan ere, hizlarien eta hartzaileen arteko bereizketak ez luke zentzu gehiegirik, lehenengoak elkarrizketa zabalagorako abiapuntuak ezartzeaz baino ez lirateke arduratuko.

Matrikulaziorako argibideak

  • Matrikula orria bete ondoren, zure posta elektronikoan mezu bat jasoko duzu, matrikulazioaren inguruko argibideekin.
  • Ez baduzu mezurik jasotzen, akatsen bat egon dela adierazten du. Horrela bada, jarri gurekin harremanetan: 943 82 14 26, i.iciar@ueu.org (Irati)

Oharrak

Talde bazkaria matrikularen prezioaren barne dago, mintegiko partaide guztiak daude gonbidatuta.