Egitatezko bikoteak eta umeen zaintza euskal Zuzenbide Zibilean.

Izena emateko epea amaitu da baina badaude plazak, interesa izanez gero, jarri gurekin harremanetan: i.iciar@ueu.eus / 943 82 14 26 (Irati)

Euskal Herrian, familia eremuari dagokionez, lege bereziak aldarrikatu ditu legegile autonomikoak Nafarroan eta Euskal Erkidego Autonomikoan, dela ezkondu gabeko bikoteen, dela umeen zaintza edo jagoletzaren gaineko auziak konpontzeko. Lau lege, horietako batzuk Konstituzio Auzitegiak inausiak, gure egungo familien ohiturak eta operadore juridikoen portaerak moldatzen ari direnak.

Ikastaro honetan, familia zuzenbideko lege autonomiko horien edukia aztertzeaz gain, bien arteko alderaketa bat ere burutuko dugu; izan ere, ikusiko dugunez, materia berdinez jarduten badute ere, euren aukerak arras desberdinak baitira. Zein erantzun eman dio euskal gizarteak araudia berriari? Erregulazio aukera desberdin hauen aurrean gizarteak emandako erantzunez ere arituko gara, agerian utziz zeintzuk diren materia honetan errealitatean dauden beharrak, eta zein arloetan egiten duten legeek huts.

Nafarroan eta Euskal Erkidego Autonomoan legegileek egin dituzten hautuak agerian jarri eta alderatu nahi genituzke, UEUko iazko saioan abiatu genuen Euskal Zuzenbide Zibilaren gaineko azterketa konparatuari segida emanez. Azterketa honek, ezinbestean, garrantzia izan dezan nahi genuke legedien proiekzio sozialera begira; batez ere kontuan izanda bikotekide, guraso eta seme-alaben interesak babestea dela helburu nagusi, eta horiek babesteko legeek ahalik eta erantzun osotuena izatea komeni dela.

 

 

FEDHAVek (Euskal Herriko Zuzenbide Historiko eta Autonomikoa Aztertzeko Fundazioa) unibertsitateko ikasleentzat 20 BEKA emango ditu (ikusi argibideak oharretan).

Irakasleak

• Itziar Alkorta Idiakez

  Zuzenbide Zibileko irakasle titularra, UPV/EHU. UEUkidea.

• Maite Barruetabeña Zenekorta

  UPV/EHUko Zuzenbide zibileko irakaslea eta Gipuzkoako Foru Aldundiko Zerbitzu Juridikoen Zuzendaria.

• Irantzu Beriain Flores

  UPV/EHUko Zuzenbide Zibileko irakaslea.

• Ainhoa Diez Sanz

  Deustuko Unibertsitateko Soziologia Ikertzailea.

• Nora Esnaola Barrena

  Abokatua, familia zuzenbidean aditua.

• Ane Fonseca Gomez

  UPV/EHUko Zuzenbideko ikaslea.

• Asun Galar Mutuberria

  Abokatua. Iruñea.

• Roldán Jimeno Aranguren

  Historian doktorea eta Zuzenbidearen Historian irakasleNafarroako Unibertsitate Publikoan. UEUkidea.

Helburuak

• Euskal Familia Zuzenbideko lege bereziak aztertzea: 6/2000 Foru Legea, bikote egonkorrentzako berdintasun juridikoari buruzkoa; 2/2003 EAEko Legea, egitatezko bikoteei buruzkoa; 3/2011 Foru Legea, seme-alaben jagoletza gurasoen bizikidetza hausten den kasuetarako arautzen duena; 7/2015 EAEko Legea, gurasoen banantze edo haustura kasuetako familia harremanei buruzkoa.
• Euskal Zuzenbide Zibil konparatua egitea Familiaren arloan.
• De lege ferenda proposamenak aztertzea.
• Araudiaren aurrean euskal gizarteak eman duen erantzuna aztertzea.

Metodologia

Ikastaro teoriko-praktikoa da.

Nori zuzendua

Ikastaro hau interesekoa da Nafarroan eta Euskal Autonomia Erkidegoan egun zabaltzen ari diren familiaren zuzenbidearen azken tendentziak jorratzeko interesa duen ikasle, irakasle eta profesionalarentzat, dela ikuspegi juridiko batetik, dela ikuspegi soziologiko batetik gaia osotasunean aztertzeko.

Zuzenduta dago,

unibertsitateko ikasleei: zuzenbidea, historia, soziologia, antropologia, eta antzeko jakintza arlokoak bereziki;

profesionalei: abokatuak, notarioak, erregistratzaileak, epaileak, eta abar.

Egitaraua

Matrikulaziorako argibideak

Oharrak

FEDHAVek emandako beka eskatzeko, ezinbestekoa da unibertsitateko ikaslea zarela adierazten duen agiriren bat (matrikula gordekina, adibidz) aurkeztea eta matrikula ordainduta izatea.

Beka eskatzeko, jarri gurekin harremanetan: i.iciar@ueu.eus, 94 679 05 46 (Irati).

Babesleak

• 

  Gipuzkoako Foru Aldundia-Euskara

• 

  Euskararen Erakunde Publikoa

• 

  Bizkaiko Foru Aldundia-Euskara

• 

  Iruñeko udala

Etiketak

ikastaroak, iruñea, legeak