304 Basoaren sekretuak ikertuz.

Ikastaro hau astelehen eta asteazkenetan (otsailak 14, 16, 21, 23) izango da.

Basoak ez du ezer ezkutatzen, nahiz eta guri sekretuak dituela iruditu. Begiratzen ikasi behar da, besterik ez. Basoak hortxe du guztia, gure begien aurrean. Oraina eta iragana ikusten zaizkio; etorkizuna igarri ahal zaio. Gizakiak basoa nola ustiatu zuen erakusten digu; norekin –animalia, landare, onddo- bizi den esaten digu; klimak, kutsadurak, ustiaketak eta abarrek nola eragiten dioten salatzen digu; dagoen tokia zergatik aukeratu duen xuxurlatzen digu; alegia, sekretuak airean dituen inguru gozagarriak dira basoak. Eta ikastaroan ikasiko dugu begiratzen, modu hotz batez –neurketak eginez, adibidez- zein modu epelago batez, subjektibotasuna erabiliz. Ekosistemak, jasangarritasuna, metodo zientifikoa eta horrelako hitz potoloak modu jostagarrian ikusiko eta ikasiko ditugu, taldeko lana bultzatuko duten talde dinamikak erabilita.

Irakaslea

• Arantxa Txintxurreta Agirre

  Biologian litzentziatua, ekosistemak espezialitatean. UEUkidea.

Helburuak

• Basoari buruzko ezagupenak sendotu eta sakondu: zuhaitz-multzotik haratago, elkar lotutako osagaien sistema konplexua ulertzeko tresnak eskaini.
• Gizakia eta basoaren arteko lotura aztertu, gaur egungoa zein garai batekoa: basoen ustiapen anitza; basoak irakurtzeko oinarrizko ezagupena landu. Baso-kudeaketa jasangarriaz mintzatu.
• Basora joateko planifikazioa landu.
• Metodo zientifikoa praktikan jarri: jakin nahia landu, galderak sortzeko; plangintza zein esperimentazioa bultzatu; ondorioak atera, eta ondorio guztiak -gustatu zaizkigunak zein gustatu ez zaizkigunak- adierazgarriak direla ikustarazi.
• Mendi-irteeran, laginak hartzeko eta neurketak egiteko metodoak ikasi.
• Mendiko-lana eta laborategikoa lan beraren bi arloak direla frogatu, mendian hartutako laginak eta neurketak laborategian aztertuz
• Ondorioak ateratzeko talde dinamikak frogatu.
• Lan eginez gozatzea; gozatuz maitatu egiten delako, eta maitatuz zaindu egiten delako.

Edukiak

• Baso ekosistemaren ezaugarri abiotikoak eta biotikoak.
• Landareen komunitateak eta dagokien fauna
• Zuhaitz-multzoaren egitura.
• Gizakia eta basoaren arteko lotura ekonomikoa/merkatal-lotura.
• Gizarte-inpaktuak
• Kartografia, irteeraren antolaketarako: orientazioa, mapa topografikoak, krokisak
• Landa-koadernoaren erabilera
• Laginak hartzeko metodoak: jolasa, marrazkia, tranpak, landa-koadernoa, argazkiak, tresnak
• Laginak eta neurketak tratatzeko metodoak: esperimentuak, eztabaidak…
• Lurraren azterketa
•  Taldeko-lanak, jokoak.
• Motibazioa, irribarrea, alaitasuna

Metodologia

Metodologia parte-hartzailea eta dinamikoa izango da. Atal teorikoa-praktikoa izango du ikastetxean, eta gero ikastetxearen hurbileko baso eremu batera txangoa egingo da.

Ikastaroa 3 ataletan banatuko da:

• Saio teoriko praktikoa- kartografia eta landa koadernoa (atal teorikoa eta tailerra)- 2’5 ordu
• Irteera basora- ikuspen sistemikoa, lurra, landare komunitateak, fauna- 3’5 ordu eta erdi
• Saio teoriko praktikoa- laborategiko esperientziak- 2’5 ordu
• Saio teoriko praktikoa - ondorioak - 1,5 ordu

Nori zuzendua

Irakasleak orokorrean.

Matrikulaziorako argibideak

Oharrak

Ikastetxea Eskolako Agenda 21 proiektuan sartuta izatea.

Babesleak

• Hezkuntza Saila

Etiketak