161 Irakaslea ikasleen nortasun-digitala garatzeko bidelagun

Matrikulazio epea: 2018ko irailaren 10etik 28ra arte, biak barne. IRAKASLEGUNEA 

Ezin da ukatu: irakaslea ikasleen bidelaguna da. Konpetentzia digitalaz ari garenean ere, halaxe da. Hori dela eta, irakasleek ikasleei lagundu egin behar diete beren nortasun digitalaz kontziente izaten, zaintzen eta eraikitzen, hori ere hezkuntza helburua baita. Ikastaro honek hori lortzeko gakoak eskaini nahi dizkie irakasleei: nortasun digitala zer den ulertzea, konpetentzia digitalarekin duen loturaz jabetzea eta hori gelan nola landu daitekeen lantzea, unitate digital bat sortuz.

Aurrez aurrekoa: otsailaren 26an (17:30-19:30) eta martxoaren 21ean (17:30-20:30)

Irakaslea

• Amaia Arroyo Sagasta

  Hezkuntzan eta Komunikazioan doktorea. Mondragon Unibertsitateko HUHEZI Fakultateko irakaslea eta ikerlaria. UEUko kidea.

Helburuak

Helburu orokorra: irakasle bakoitzak, nortasun digitalaren kontzeptua eta konpetentzia digitala oinarri hartuta, horixe ikasleekin lantzeko unitate didaktiko bat diseinatzea.

Helburu zehatzak:

• Nortasun digitalaren kontzeptua ulertzea eta konpetentzia digitalarekin lotzea.
• Sare sozialetako jardunari buruz hausnartzea (segurtasuna, pribatutasuna eta ikuspuntu hezkidetzailea).
• Baliabide digitalen bidezko sormena baloratzea.
• Unitate didaktikoak diseinatzean konpetentzia digitala kontuan hartzea.

Edukiak

• Hiritarren konpetentzia digitala (DIGCOMP ereduan).
• Sare sozialei lotutako edukiak: segurtasuna, pribatutasuna eta ikuspuntu hezkidetzailea zer diren.
• Unitate didaktiko digitalak diseinatzeko canvasa (Arroyo, 2015).
• Unitate didaktikoetan erabiltzeko tresna digital erabilgarriak.

Metodologia

Ikastaroa blended-learning motakoa izango da eta, horretarako, Moodle irakaskuntza-plataforma batean oinarrituta dagoen UEUren ikasgela birtuala erabiliko da eta aurrez aurreko bi saiorekin konbinatuko da.

Aurrez aurreko saioetan, ikastaroaren erritmoa bermatzeko laguntza eskainiko zaie ikasleei.

• Hasierako saioan, ikastaroan zehar landuko diren edukien aurkezpena egingo da, baita ikasgela birtualaren funtzionamenduaren azalpen txiki bat. Horrela, ikasle guztiek maila berean konponduko dira ingurune birtualarekin. Horrez gain, lehenengo gaian murgilduko gara, konpetentzia digitalaren markoen ikuspegi orokor bat landuz.

• Amaierako saioak ikastaroari osotasuna emango dio, izan ere, egindako proiektuak (unitate didaktikoak) aurkezteko eta ko-ebaluazioa egiteko erabiliko dugu. Bertan ere, etorkizunerako lankidetza-proposamenak edo aukerak jorratu daitezke.

Ikastaroa parte-hartzailea eta praktikan oinarritutakoa izango da, guztion artean ikasteari berebiziko garrantzia emanez. Oinarri kontzeptualak idatzizko zein ikus-entzunezko materialen bidez (bideoak) landuko dira. Ondoren, landutakoaren inguruko praktikak proposatuko dira, ikasleen parte-hartzea eta hausnarketa kritikoa bultzatuz. Horretarako, ondorengo estrategiari jarriko dira martxan:

• Bakoitzaren portfolioa: ikasle bakoitzak bere bloga zabalduko du eta bertan ikastaroan egindakoa lantzen joango da.

• UEUren ikasgelako foroa: ikasleen eta irakaslearen arteko elkarreragina bultzatzeko eta lanketa egiteko, foroan sustatuko da komunikazioa, ahalik eta parte-hartze handiena bultzatuz.

• Twitter: elkarrizketa mundura zabaltzeko, Twitter erabiliko dugu. Ikastaroari traola bat esleituko diogu eta horrekin elkarrizketa sareratu egingo dugu.

Aipatu bezala, amaieran, ikastaroko gaitasunetan oinarritutako proiektua burutuko da, ikastaroa borobilduz. Foroetan, sortutako iritzi, hausnarketa, esperientzia edota zalantzak ikaskideekin partekatzeko aukera izango da, taldeari modu eraikitzailean eraginez. Ikasleek momentu oro irakaslearen jarraipena eta tutoretza izango dute.

Nori zuzendua

Bigarren Hezkuntzako irakasleak, Derrigorrezko Bigarren Hezkuntza eta Batxilergo Orientatzaileak

Matrikulaziorako argibideak

Babesleak

• Eusko Jaurlaritza.Hezkuntza, Unibertsitate eta Ikerketa saila

Etiketak

sare sozialak, konpetentzia digitala, nortasun digitala