banner -- Bullyingaren mugak gainditzen jardunaldia

Ikastaroak :: Pedagogia

Bizitzaren eskola: askatasunerako pedagogia

  • Hasiera-data: 2017(e)ko azaroaren 4a
  • Amaiera-data: 2017(e)ko azaroaren 26a
  • Tokia: Iruñea - UEUren egoitza
  • Nola heldu: http://www.tagzania.com/pt/ueuren-iruneko-bulegoa/
  • Ordutegia: 3 Larunbat eta igande 1. 9:30-14:30/16:00-20:00(larunbatetan), 09:00-14:00 (igandean)
  • Izaera: Presentziala
  • Ordu kopurua: 32.00 ordu
  • Matrikula-epearen hasiera: 2017(e)ko irailaren 4a
  • Matrikula-epearen bukaera: 2017(e)ko azaroaren 2a

Ikastaroaren datak eta ordutegia:

  • azaroaren 4a, 18a eta 25a (larunbatak). Ordutegia: (9:30-14:30 / 16:00-20:00).
  • azaroaren 26a (igandea, Goiztiri eskolara bisita). Ordutegia: (09:00-14:00).

Haurren garapen-prozesuan modu egokian laguntzeko eta lagun egiteko eskolaren nolakotasuna eta izaera errotik aldatu behar dira. Eskolak ukan beharreko ezaugarriak sakonki aztertuko ditugu formazioan zehar, modu teorikoan eta bibentzialean. Haurren prozesuan oztopoa izan beharrean bidelagun egokia izateak dakarren aldaketa ez baita teorikoki bakarrik ikasten eta jakiten ahal den zerbait, oso garrantzitsu deritzogu helduaren hausnarketa prozesuari eta bere buruan arakatzeko gaitasunari. Horretan laguntzeko ariketak izanen dira hortaz teorikoagoak izanen diren saioen osagarri. Eskolak nolakoa behar lukeen atalean eskola baten sortze-prozesuan kontuan hartu beharreko aldagaiak landuko ditugu banan-banan, praktikotasun osoarekin. Beraz, pedagogia aktiboari buruzko saio teorikoak, arlo bibentzialarekin eta eskola bat eratzeko beharrezkoa den informazio praktikoarekin batera joanen dira. Hurrengo belaunaldien garapen-prozesuan lagundu nahi duen orok jakin beharreko ezinbesteko edukiak aurkituko ditu ikastaro iraunkor honetan.

Ane Ablanedo, gaiari buruz eginiko elkarrizketan, hemen

Irakasleak

  • Ane Ablanedo Larrion

    Bigarren Hezkuntza eta unibertsitateko irakaslea Iruñean eta Baionan. Psikoterapia eta neurosiaren prebentzioan aditua. UEUkidea.

  • Ane Otxoteko Vaquero

    GOIZTIRI eskola librean koordinatzaile eta bidelagun. Haur Prebentzioan aditua.

Helburuak

  • Haurren benetako beharretara egokitutako eskola baten nolakotasuna ezagutzea.
  • Helduen formazio-prozesuan hausnarketa bibentzialak duen garrantziaz ohartaraztea.
  • Ikastea bezain garrantzitsua da gure heziketaren ondorio diren baldintzapenen des-ikastearen prozesua.
  • Eskola on batek ukan beharreko ezaugarriak sakontasunez eta praktikotasunez jakitea.
  • Pedagogia aktiboaren klabeak ezagutzea eta horietan sakontzea.
  • Haurrekin kalitatearekin egoteko eta aritzeko trebatzea.

Edukiak

Haztea. Ikastea. Heldu bilakatzea.

Haurren garapen-prozesuan bidelagun egoki bilakatzea helburu duen formazio batek ezinbesteko abiapuntu du funtsezko kontzeptu horien gaineko hausnarketa. Zer den haztea, zertan datzan haziera-prozesu naturala, zeintzuk diren prozesu horretan gertatzen ahal diren interferentziak, bai eta haztearen aurrean aktibatzen ahal diren erresistentziak ere. Zein baldintzatan gauzatzen ahal den benetako ikasketa. Gure jarrera pedagogikoaren oinarrian ezarri beharreko gogoeta.

Askatasuna.

Batzuetan hain labainkorra zaigun askatasun-kontzeptuaren benetako esanahiaren bila abiatuko gara saio honetan, aske izateko aukera geure buruari zenbateraino mugatzen diogun kontzientzia hartzearekin batera. Izan ere, benetan aske delarik baino ez baitezake helduak zaindu berarekin harremanean den haurraren askatasuna.

Garapenaren etapak

Hazteak, garatzeak, etapa ezberdinak bizitzeak eta euren arteko trantsizio egokia burutzeak duen garrantzia kontuan izanda, etapa horiek zehazki deskribatu eta berez dakartzaten ezaugarriak ezagutuko ditugu saio honetan zehar, bidelagun bezala jakin ahal izan dezagun honen guztiaren aurrean nola kokatu.

Bidelagun izatea

Lagun egitearen atzean dagoen oinarrizko ikuspegi pedagogikoa, egun indarrean den eskola-eredu konbentzionalarekin alderatuko dugu, bien arteko ezberdintasunak zehaztu eta azpimarratuz. Haurrekiko bizipen egunerokoetan akonpainatu egin ahal izateko moduak begiratu eta landuko ditugu, bidelagun izateko autoformakuntza etengabearen garrantzia eta gakoei buruz hausnarketa eginez.

Erlazionatzeko moduak

Haurrekin egoteko garaian errespetuan oinarritutako harremanen garrantzia oinarritzat hartuta eta modu osasuntsuan erlazionatzeak dakarren onura ukaezina izanik, besteekin erlazionatzeko ditugun moduei buruz arituko gara saio honetan, horietako bakoitzari nondik, nola eta zertarako ekiten diogun sakonki aztertuta.

Mugak (limiteak) eta ondorioak

Askatasuna oinarri izan nahi duen jarduera batean ezinbestekoa da ongi zehaztea muga edo limitearen kontzeptua. Bizitzak berak erakusten digu mugen presentzia, garrantzia eta berezkotasuna. Limiteek duten zentzua eta horiek jartzeko nola egiten dugun eta nondik abiatzen garen gogoeta egitea oso garrantzitsua eta ezinbestekoa da. Ekintzen ondorio eta zigorraren artean dagoen sakoneko ezberdintasuna antzematea ere izanen da saioaren helburu, ondorioen berezkotasuna azpimarratuz.

Espazioak. Giroa. Materialak

Akonpainatu ahal izateko lagungarriak zaizkigun aldagaien artean, espazioak, giroak eta materialek duten berebiziko garrantziaz mintzatuko gara, dauden aukerak aztertuz eta praktikara eramanaz, bizipen pertsonalak garamatzan gogoetaraino iristeko.

Etxea eta eskola

Haurraren bizitzaren bi ekosistema garrantzitsuenak izanik, ezinbestekoa da zehaztea eremu horietako bakoitzaren funtzioa eta ardura. Bi espazio horien arteko koherentzia eta komunikazioa ahalik eta handiena izatea funtsezkoa da haurra sano haziko bada. Saioan zehar saiatuko gara erlazio horretan hain garrantzitsua den ordena ezartzen, baita bi espazioen arteko trantsizioa ongi gauza dadin egokitzapen-prozesuaren garrantzia azpimarratzen ere.

Metodologia

Formakuntza parte-hartzailea eta esperientzietan oinarritutakoa izanen da.

Nori zuzendua

Irakasle, guraso, hezitzaile zein gaian interesa duen edonori zuzendua.

Matrikulaziorako argibideak

  • Talde mugatua: gehienez, 20 pertsona.
  • Matrikulatu aukera sakatu (goian dago, izenburuaren azpian) eta bertan agertutako zaizun fitxa bete.
  • Matrikula-orria bete ondoren, zure posta elektronikoan mezu bat jasoko duzu, matrikulazioa eta ordainketaren inguruko argibideekin.
  • Ez baduzu mezurik jasotzen, akatsen bat egon da. Horrela bada, jarri gurekin harremanetan: 948 362563, nafarroa@ueu.eus, (Edurne).
  • Hemen UEUren matrikulazio-araudi orokorra.
  • Diru-laguntzen informazioa.

Etiketak

etengabeko formakuntza, haurrak, nerabeak, heziketa, garapena, errespetua, eskola librea, UEU, Iruñea, ikastaroak

Copyright @ 2017 UEU -- Bisitariak: 678768

Gure cookieak eta hirugarrenenak erabiltzen ditugu zure nabigazio-esperientzia hobetzeko eta eduki eta funtzio berezituak eskaintzeko. Nabigatzen jarraitzen baduzu, erabilera onartzen duzula ulertuko dugu. Argibide gehiago eskuratzeko: cookie-politika.