Ikastaroak :: Informatika, Internet

HTML aurkezpenak egiten Reveal.js plataformarekin

  • Izaera: Presentziala
  • Ordu kopurua: 12.00 ordu
  • Matrikula-epearen hasiera: 2017(e)ko urtarrilaren 31a
  • Matrikula-epearen bukaera: 2017(e)ko apirilaren 21a

Ikastaroaren datak: maiatzaren 8a, 10a, 15a eta 17a (astelehen-asteazkena), 17:00etatik 20:00etara.

Gaur egun aurkezpenak egiteko gehien erabiltzen den teknologia Powerpoint da, baina hainbat desabantaila ditu: programa propietarioa eta ordainpekoa da, aurkezpena egin behar den ordenagailuan programa horrek instalatuta egon behar du (eta komeni da bertsioa ere bera izatea)... Modan dauden beste aukera batzuk (Prezi, adibidez) ez dira hobeak.

Aldiz, badaude HTML aurkezpenak egiteko hainbat plataforma edo liburutegi. Aurkezpen horien formatua HTML estandar irekia da, liburutegi horietako asko libreak dira, aurkezpena egiteko nabigatzaile bat besterik ez da behar (eta edozein nabigatzailek balio du)... Reveal.js da HTML aurkezpenak egin ahal izateko liburutegi horietako bat, aukera asko dituena eta aurkezpen ikusgarriak egitea ahalbidetzen duena.

Ikastaro honetan Reveal.js bidez HTML aurkezpen bat egiten ikasiko dugu, baina baita pluginen bidez plataforma horren aukera gehiago aprobetxatzen ere. Eta plugin berriak nola egin daitezkeen ere ikusiko dugu.

ikusi hemen ikastaroaren aurkezpen bideoa: Igor Leturia, HTML aurkezpenak

Irakaslea

Helburuak

  • HTML aurkezpenak eta Reveal.js ezagutzea.
  • Reveal.js erabiliz HTML aurkezpenak egiten ikastea.
  • Reveal.js-ko pluginak eta ezaugarri aurreratuak erabiltzen ikastea (PDF esportazioa, hizlariaren ikuspegia, emankizun kontrolatua...).
  • Reveal.js-rako plugin bat egiten ikastea.

Edukiak

  • Zer dira HTML aurkezpenak eta Reveal.js?
  • Reveal.js aurkezpenak sortu aukera eta plugin orokorrekin.
  • Plugin aurreratuagoak erabiltzen ikasi.
  • Reveal.js-ri funtzionalitate berriak gehitu, Javascript erabilita plugin berriak programatuz.

Metodologia

Ikastaroan erabiliko den metodologia teoriko-praktikoa izango da. Eduki teorikoak lantzen eta adibide errealak ezagutzeko aukera daukagun heinean, ikasitakoa praktikara eramateko aukera izango dugu zenbait aurkezpen edo plugin sortuz.

Nori zuzendua

Ikastaroak, klaseak, hitzaldiak edo dena delakoak eman behar dituelako aurkezpenak egin behar izaten dituen edonori dago zuzendua, formatu estandar (HTML) eta tresna libre (Reveal.js) batekin aurkezpen elegante, multiplataforma eta ikusgarriak egiten ikasteko.

Azken zatiak, Reveal.js-rentzat plugin berriak garatzearenak, programazio-ezagutzak eskatzen ditu, zehazki Javascript lengoaian. Hala ere, ikasle bakoitzaren profilaren eta nahien arabera, gehiago edo gutxiago landuko du bakoitzak azken zati hori.

Matrikulaziorako argibideak

  • Matrikulatu aukera sakatu (izenburuaren azpian dago ikonoa) eta jarritu matrikula-orria betetzeko argibideak.
  • Matrikula-orria bete ondoren, mezu bat jasoko duzu zure posta elektronikoan, matrikularen eta ordainketaren inguruko argibideekin.
  • Ez baduzu mezurik jasotzen, akatsen bat izan da. Horrela bada, jarri gurekin harremanetan: 943 82 14 26, markeskoa@ueu.eus, (Mari Karmen).
  • Talde mugatua: gehienez, 15 pertsona.
  • Hemen UEUren matrikulazio-araudi orokorra.
  • Diru-laguntzen informazioa.

Oharrak

  • Eusko Jaurlaritzak Euskal Autonomia Erkidegoko unibertsitateaz kanpoko irakasleentzako prestakuntza-ikastaro moduan homologatuta. Homologazio kodea: 1768348009.
  • Ikastaroa ordenagailu-gela batean emango da eta ikasle bakoitzarentzat ordenagailu bat egongo da, baina norberak bere eramangarria ere eraman dezake. Gelako ordenagailuek Windows daukate eta ikastaro osoa Windows ordenagailuekin egin daiteke. Hala ere, ikasleak Linux-ekin ohitura badu, bere Linux eramangarria eramatea gomendatzen da, Reveal.js-ren aukerarik aurreratuenak errazago baliatzen baitira Linux ordenagailu batean.

Babesleak

Etiketak

ikastaroak, powerpoint, prezi, liburutegi libreak, aurkezpenak, UEUren Ikastetxe Nagusia, Eibar

Copyright @ 2019 UEU -- Bisitariak: 683568

Gure cookieak eta hirugarrenenak erabiltzen ditugu zure nabigazio-esperientzia hobetzeko eta eduki eta funtzio berezituak eskaintzeko. Nabigatzen jarraitzen baduzu, erabilera onartzen duzula ulertuko dugu. Argibide gehiago eskuratzeko: cookie-politika.